Гледам и не ми се верува. Мицкоски како секој добар политички хемафродит, во својата политичка не оригиналност и незнаење, растргнат помеѓу примерот на политичко делување на Трамп, Орбан и Вучиќ се обидува да ги копира сите тројца во едно, три во едно, промешај и употреби. А потоа пак, како првиот и третиот, во јавност ретерирај.

Но не бива таа работа. Му реков и тоа одамна, дека Македонија се наоѓа во Европа и во дворот на Европската унија. А тоа значи дека центарот на моќ е Брисел и со него Лондон, Париз, Берлин, Рим, но не и Будимпешта и никако Москва, а Вашингтон под определени услови не врзани личносно.

И јаден Мицкоски сето тоа ниту го гледа, ниту пак го разбра. Затоа во само едно интервју кое изгледаше како разговор на пијани соселани пред селска кооперација, покрај тоа што ништо суштински не кажа, успеа да направи четири клучни грешки. Грешки кои еден пристоен, центро-десничарски и про европски премиер во никој случај не смее да ги направи. Згора на се, низ тие грешки покажа незнаење и тоа незнаење на базично ниво, а што е срамота за еден универзитетски професор – колега, па нека е и од техничките науки. Впрочем тоа е јасен индикатор на капацитетот, не само личниот интелектуален, туку и личен политички и демократски капацитет.

Најпрво, Мицкоски, од позиција премиер, го доведе во прашање нашето сојузништво со партнерите од НАТО. Ова го направи на исклучително перфиден начин при што се обиде да се додвори на македонските граѓани. Оваа грешка втемелена пред се на политички популизам ја доведува Македонија во состојба на не доверлив партнер во НАТО. Не верувам дека Мицкоски не знае дека Македонија како земја членка на НАТО има декларирано сили со кои е должна да учествува во рамки на операциите на НАТО доколку тоа се побара од неа. Овие сили кои сме ги декларирале како НАТО сили, не ни се наметнати, туку самите ние сме кажале дека Македонија е способна и може да опреми и екипира таква и таква единица и да за истата обезбеди иста таква замена на секој шест месеци, односно пополнување на истата при евентуални загуби. И тоа е тоа, сега нема сакам – не сакам, нема играње популизам, божем ете Мицкоски се грижи за нашите војници, а всушност се грижи за сопствениот политички опстанок и за тоа како ќе се раздолжи таму каде што се задолжил политички или на друг начин. За неговите долгови нема право да ја задолжува, односно става во залог нашата партија ВМРО-ДПМНЕ, а никако нашата држава Македонија. Во контекст на декларираната единица за НАТО, само да појасниме дека тоа не се војници на отслужување на воен рок, тоа се професионални војници кои при стапувањето во АРМ при здрав разум, во нормална психо-физичка состојба утврдена од воено-лекарска комисија, доброволно и потполно запознаени со условите, потпишале договор за вработување во АРМ. Тоа што Армијата го има како обврска кон нив е да им обезбеди соодветна опрема и лично и колективно вооружување и да ги обучи за ракување со оружјето и опремата во основните поединечни и тактички постапки на единиците во кои стапиле на служба. Државата Македонија им ги обезбедува сите финансиски и други принадлежности кои по Закон им припаѓаат. За подофицерите и офицерите од декларираната единица како команден кадар вработен во АРМ на неопределено време, нема што да се зборува, тоа е нивен животен повик. Оттука, никој не ги прашува припадниците на декларираната единица дали сакаат или не сакаат да одат во мисија или на задача, тие тоа го прифатиле уште кога го потпишале договорот со АРМ. Затоа овој популизам на Мицкоски е само трескање глупости кои директно нанесуваат штета на македонските интереси во рамките на НАТО, со сите последици од таквото однесување. Впрочем, доколку ги почитуваш договорите, можеш да очекуваш дека и твоите партнери во НАТО исто така ќе се однесуваат кон тебе.

Потоа во истиот контекст, Мицкоски покажа исклучително незнаење, недозволиво за еден премиер и тоа на НАТО држава. Оставам можност дека Мицкоски во истиот контекст на популизам направи свесна манипулација со граѓаните, а тоа е полошо отколку незнаење и претставува намерно ширење на дезинформации со што нашиот премиер на јавна сцена учествува во хибридно војување против сопствената држава. Имено, Мицкоски кажа дека ние испраќаме мировни сили во регионот, кажа и остана жив. Аман Христијан, сите наши единици или поединци кои се наоѓаат во регионот во составот на КФОР или СФОР или во состав  на НАТО единици во Бугарија, Романија или пак поединци во Балтичките земји, не се во мировни операции, туку се во состав на НАТО операции и под заедничка команда на НАТО. Ова значи дека појма немаш или дека јавно лажеш и манипулираш со сопствените граѓани. И во двата случаи тоа што го покажа пред нашите партнери во НАТО е дека не сме сојузник во кој може да се има доверба. Е сега засега, таа доверба е нарушена во однос на политичката доверба, но знаејќи дека политиката донесува одлуки кои се однесуваат на армијата и нејзината употреба, може да кажеме дека наскоро и самата армија ќе ја направиш недоверлив партнер.

Покрај незнаењето и повторно занесен од популистички тенденции, Мицкоски покажа високо ниво на недостаток на демократски капацитет. Прво, и основно, покажа дека е склон кон автократско управување со Македонија. Тоа го покажа преку директното мешање од позиција на извршна власт во работата на законодавната и судската власт. Ова отиде дотаму што јавно се закани врз судската власт дека ќе им се случи народ (така говореше и Милошевиќ на Газиместан-да се потсетиме) и дека самиот тој прв ќе излезе на протести против судската власт. Покрај недостигот на демократски капацитет, оваа изјава покажува дека Мицкоски не го познава ниту Уставот на Македонија во кој јасно е поделена власта на законодавна, извршна и судска и секоја од овие има контрола над друга и во тој триаголник извршната власт не е таа која има најголема моќ, таа е под контрола на законодавната и судската власт. Тоа што Мицкоски не знае или не сака да спроведе законски втемелени реформи во однос на судската власт и борбата против корупцијата и криминалот (да не заборавиме дека нема ништо од враќање на укинатите членови од Кривичниот законик), тоа е негов проблем. Доколку нема кој да го посоветува како тоа се прави демократски и законски, еве ние како Внатрепартиска фракција во ВМРО-ДПМНЕ ќе го упатиме на Кореши како обвинител на ЕУ за да побара помош од неа. Жената има искуство, ама и нема милост за корумпираните и арамии политиканти. Е па Христијан повели, доколку не се плашиш.

Но, за да биде смешно и самиот себеси да се претстави како несериозен (реков ама не реков), по реакцијата на ЕУ дека се меша во судската власт и прави притисок, Мицкоски неполни 24 часа по ужасното интервју, во изјава за медиумите тврди дека не кажал така, туку само предупредувал за да не било дека не кажал. Аман бре Христијан, барем да си маж како Вучиќ па да опстојуваш во инаетот, ама ти ем сакаш да си мали Вучиќ, ем да си мали Трамп, па тврдиш дека не си кажал тоа што си кажал, а камерите снимиле. Ем пак сакаш да бидеш мали Орбан и како диктатор да се правиш силен пред Европа, но штом јасно ти кажат дека те гледаат што правиш, ти се правиш на два и пол дека не си разбран, изваден од контекст, само си предупредувал итн.

И последната глупост која ја истресе, а која покажува дека ти врска немаш од демократско владеење, почитување на законите, спроведување на истите и правото и правдината на која многу љубиш да се повикуваш, туку само те интересира веќе јасната констатација дека те интересира гол опстанок на власт. Тоа е случајот со министерот за Труд и Социјална политика, Лимани. Американската амбасадорка јасно кажа дека на човекот не му е дадена виза за САД, ти се направи на будала со некаков блед изговор и не одговори на прашањето зошто е тоа така, но самиот Лимани си кажа дека тоа е поради сторени меѓународно казниви кривични дела. Но ти Христијан наместо да преземеш чекори како премиер и да го разрешиш Лимани од функцијата иако во нормални демократски држави за еден ваков скандал паѓа влада, ти се одлучи на македонските граѓани да им објаснуваш како  Лимани ти е куќен пријател и добар човек. Ами ти не си премиер на тато, мама, твојот дом, или маало, ти си премиер на меѓународно призната држава и должен си да го штитиш угледот и да ги спроведуваш законите и Уставот на Македонија. Тоа дека Лимани е добар човек, не се сомневам, нека е жив и здрав, но едноставно, колку и да ти е пријател не може да остане министер, па не е македонската влада, влада на твој лични пријатели или твоја приватна влада. И во овој контекст, каде е сега обвинителството да покрене постапка против Лимани за утврдување на можна кривична одговорност поради како што самиот призна, сторени меѓународни кривични дела во корист на Али Ахмети? Ова не е политичко прашање, а уште помалку лично прашање помеѓу Лимани и Ахмети, ова е прашање на сторени кривични дела поради кои Лимани не може да добие виза за влез во САД. Прашање е дали Лимани може да патува и во европски или други држави а да при тоа не биде уапсен и изведен на суд. Е тоа е Мицкоски твојот не демократски капацитет кој го покажуваш пред сите македонски граѓани.

Токму затоа, како што ти кажав, го трошиш мандатот во секој аспект многу брзо и без било каков позитивен ефект за Македонија.

На нашите сојузници им кажа дека не сакаш да сме сојузници, дури и на Турција која е една од носечките НАТО држави во однос на европските мировни сили во Украина, а наш стратешки партнер и покажа дека не може да има доверба во нас. А пред две недели беше кај Ердоган и се колнеше во стратешкото партнерство со Турција. Таа превртливост во кажаното а потоа во праксата и немањето конзистентна политика во меѓународните односи и уште дополнето со не демократски капацитет, пред се личен, твој, но и на владата со која раководиш е многу добро забележено. Забележано е од нашите европски и НАТО партнери пред кои си маче, забележано е дури и тоа како  се однесуваш кон синдикатот, насилно и навредливо според методите на Вучиќ со правење на паралелни синдикати. Забележано е дури и твоето однесување, секако не демократско внатре во нашата партија ВМРО-ДПМНЕ и маргинализацијата на Внатрепартиската фракција и на секој поединец или неформална група членови кој не се согласува(ат) со твоите политики погубни за Македонија, македонскиот народ и партијата.

Немаш многу време да се поправиш, да побараш и да добиеш помош за да ги смениш политиките и да не предизвикаш поголема штета врз државата. Но ти си знаеш, сојузништвото и довербата во сојузите се градат со чесен, конзистентен и јасен пристап и политика. Демократскиот капацитет е лична состојба и отвореност на умот, нешто како подготвеноста за учење и да се научи. Но и за двете состојби сметката се плаќа. Се надевам дека сметката нема да биде превисока за македонските граѓани, а особено за македонскиот народ. А убеден сум дека македонските граѓани не се подготвени да ги плаќаат твоите сметки заради твоите будалаштини и ѓелба да бидеш мали Вучиќ. Впрочем протркалај ги очите и фрли поглед кон Белград да видиш како на крајот завршува оној кој нема сојузници, во кој никој нема доверба и кој немајќи демократски капацитет создаде авторитарна држава во која институциите не функционираат. Како полтроните и клиентелистите со кои се опкружи (како што ти тоа го правиш) исплашени и секако неспособни, во потполност се парализирани и не се во состојба да му помогнат на својот мал бог кога најмногу му треба здраво разумско расудување. Тие мислат на себе и на својата кожа кога ќе дојде време за плаќање на сметките. Колку и да се обидуваш да го имитираш Вучиќ, па дури и неговите зборови ги повторуваш, претставувајќи се како жртва за сите и за се, себе жртвување преку кое на себе ја преземаш одговорноста за се во државата. Впрочем, па ти и си најодговорен за работата на владата, а со тоа и на институциите на државата. Ами министрите во твојата влада се малолетни или не дај Боже малоумни па ти преземаш одговорност за нивните постапки и работење? Бравос за тебе, вистински мал автократ, само што на истите тие министри не им е јасно дека во такви околности утре во зор заман, први ќе одат курбан и тоа со твој амин. Секој од нив е полнолетен граѓанин на Македонија и во потполност носи одговорност за своите постапки и политики, без разлика дали се способни да извлечат емпириски заклучоци или се реално образовани или се со купени дипломи па немаат научени лекции. Ти Христијан, не се научи дури ниту на примерот на Заев кој сакаше да биде начело на судските реформи, па сакаше да биде и премиер и министер за финансии во исто време и кој ги уништи македонските институции.

Тешко учиш очигледно. Но затоа многу бргу и ти лично и владата и нашата партија, но и нашата Македонија останува без сојузници надвор и помеѓу граѓаните, без доверба кај партнерите, но и кај граѓаните, а за не демократскиот капацитет, тоа веќе се гледа, што се вели и од авион, оној владин – твој чартер за 200 илјади евра наши пари.

 

Оливер Андонов